Хоризонт Турново го задржа прволигашкиот статус

Објавено на 07 Јуни, 2015 во Прва МФЛ, Вести

Екипата на Хоризонт од Турново е 10-иот тим кој следната сезона ќе се натпреварува во Првата Лига, откако го победи Гостивар со резултат 2:0 во вториот реванш натпревар од баражот за пополнување на Првата Лига.

Првиот натпревар заврши нерешено 1:1, така што Хоризонт со вкупен резултат од 3:1 го осигура прволигашкиот статус. Натпреварот почна со блага иницијатива на Гостивар, а Хоризонт нешто по повлечено чекаше шанса од контра. Првата закана дојде во втората минута кога Таири нафрли од слободен удар, Рамадани биеше со глава, а на голот сигурен Захов. Се играше 16-тата минута кога Турновци од корнер нафрлија на втората статива каде беше заборавен осамен Кристијан Иванов, кој со глава погоди за 0:1. Во 21-та минута Пандев биеше од слободен удар, но за малку над голот. Хоризонт продолжи да игра на контри и тоа даде плод во 35-тата минута кога Пандев повлече еден класичен противнапад и нафрли на другата страна од каде топката беше спуштена за Ташев кој со прецизен удар погоди за 0:2 и солидно водство за Хоризонт. До крајот на првиот дел се заканија Нуриши и Белули, но во двата случаи Захов беше сигурен во голот. Во вториот дел се очекуваше Гостивар да има иницијатива, но подобрите шанси ги имаше Хоризонт. Ташев во 50-тата минута помина неколку играчи и излезе сам пред голот но Нухии со пад во нозете успеа да спаси. Во 64-тата минута по центаршутот на Милушев, Пандев биеше непрецизно од изгледна ситуација, а малку подоцна по киксот на Нухии Кочоски со глава го преврли презниот гол. Во продолжение Пандев биеше силно над голот, а Гостивар посериозната шанса за гол ја имаше дури во 90-тата минута кога Алији биеше силно, а Захов одбрани одлично. На крајот радоста им припадна на играчите на Хоризонт Турново, кои остануваат прволигаши, а Гостивар својата шанса ќе ја очекува на некоја наредна прилика.